A 'N PUETA

Scarpa grossa

'L diiŝ 'n pruerbi dei temp passat
a prupòsit de certi cuntadèn
che cu' 'na gran dòta i sia naat:
la scarpa grossa e... 'l servèll fèn!

'N siùr cu' 'l mal de la palanca
padròn de terri, de besti e de ŝènt
a l'umbra, 'l se cunsulàa che 'n banca
'l ghèra dei sold e... j'ha cüntàa cu la ment.

'L fürbèn 'l se 'ngrassàa alla faccia
de chi, che ghe dàa fadiga e südur
ma Tonj, 'l càalèr l'era 'na maccia
che, cu' la stima del siùr, 'l fa de fattur.

Cuŝè che 'l se dàa mutif quasi ogni dè,
'n punta de pèe cu' 'l capèll in màa,
d' 'ndàa a cunferii, 'n de l'ura del meŝ-dè
per rimediaghe almenu al diŝnàa.

Cun l'aria studiada de tanta devuŝiòn
'l riferia, present la siùra Paula...
de chèll che ghéra de fa: 'l padròn
'l ghe mettia la scregna alla so taula.

La dumenica vegnent alla ca' padrunal
ghera dei siùr furester, tutti 'nvitat.
“'L saress 'n de griŝ che porta mal
se Tonj 'l ghess de vegnii, chell sfaciàt!...”

l' udurèn de pietanŝi buni li rimpìa 'l naŝ
i giràa per l'èra, i spiŝigàa fam e fantaŝia:
Tonj 'l 'na pudìa pö de manda ŝù e taŝ!...
La siùra, 'l l'ha vardàa e la se diertìa.

“Adess vöri vedd e vöri divertii i me amiŝ...
a chella vèccia vulp vöri faghe la festa!
Se, go 'n'idea che ga miss li radiŝ
della surpresa, chi 'n de la me testa”

-Eccu siùr, 'l me reŝidur! L'è n'om de filusufia...
Tonj, vöri fate n'invìit sincer e... cun unur!
Prima però te metti alla pröa: sbaglia mia.
Se te rièset bèn.. Sü no, j'è dulur.

'N sö 'l taul, te vedèt; ghè 'n capòn a less
farcìit de giambon, funŝ e amarett...
fa mia chella faccia de smurbièss!
Sö, güzza 'l talent, che te sèet mia 'n fiulett.

Però chell che te ghe fèet al pull, te'l fo a te
Ghe strepèt 'n'ala, te tàj 'n brass
ghe sgagnèt 'na cossa oppür 'l carrè...
Penseghe bèn e müsüra i to pass-

Toni '1 se grata la crapa e poò 'l suspira...
'l fà 'na faccia lunga cun l'aria scüra.
Po', 'na lüüŝ 'n de jöcc ... se prufila
l'idea de ciappa 'l pull sensa paüra.

'L ghe mett 'l dit 'n del ciciaròn e a rampèn
'l ghe tira föra 'l ripièn... i siùr befat i ga capit
e j'è restat de stücc: i lassa 'ndàa 'l servell fèn
cu' 'l pull sutta 'l brass, da due l'è vegnit.