A 'N PUETA

Bombo !

El ghìa 'na faccina de terra cöta en fund a 'n crapon.
El nas rènsignat en sö i laber vèrt, cu i dent de cicott.
i'öc-c picenén, distant e gris cume d'en gatt surion.
L'era Bombo, el sunàa l'articat cu l'aŝen, el fàa el cercott.

Alla sera de méŝa stemana, dopu 'na sèna en po magra
en sö la tèra batida, i'om li duni e i pütei.
I fàa la culèta e...parìa el dé de la sagra.
Per quater salt, se sbattìa per aria saàti e süpéi!

En del bèll, en carabinier e l'apuntat d'ispesiòn
I se ferma: l'apuntat - Che famu cà? Iamme bello;
E' tardi la festa è finita. Smammare - Li cansòn
Li tas, i balerén i cerca li saàti...- Movite o ciuciariello!-

-Ma, enfina li dèŝ.. anca me cunussi i regulament -
Bombo cu l'ureloc-c a sigula en màa - Adèss senti...
s'el dis, e chèstuchì, l'è'n pissot de ducument-
L'apuntat el cuntrolla e po el salüda en sö l'atenti.

Bombo el mèna la manètta, me ghe porti en po de palancòn
e, el ballarott el và.- Ghi sentit la batìda de tacc?-
-En guèra go ciapat 'na medaia de brunŝ e i galòn.
Sii sergent. Daànti a me chél lè el s'endrissa de scatt!-

El me 'arda en po' de sbièss cu'n ghignètt de suriòn.
A te t'el diŝi, perchè te ghèt la facia de 'nteligént.
En suldat cu sètt müi, fai la spola al Cumand Dilisiòn,
purtai l'aqua, i viver la posta en trincea. Sii cunducent.

Ghera en mülètt che l'era 'n cancher! Se te staèt mia atent
el te ciapàa per el cupén, i'ureci, la ghigna. li màa...
Quant so 'riàt me, i gà tirat el buff tütti, cuntent.
Ma i sia mia, che cun me ghera mia tant de bacéllàa.

Se al guèrnu i ghe cupa 'n suldat, a Ruma i tira sö la riga.
Ma se i ghe cupa en mül...L'è 'na roba enfin ridicula!
Raport, verbai al Ministero, en tre copii... l'è 'na fadiga!
A Ruma se manda enfina "el socul del mül cu la matricula".

Na matina, en ciopp de luf che i v'udula de fà paüra
mort de fam,el ve vers de me en de la nef a rigulòn.
Ghè egnìt el "mument del mül catif" e cu 'na grinta scüra 
go ciapat 'na decision...Sbatìll ŝo per semp, cu 'n rüŝòn!

I luf i ga cambiat diresiòn. Cu'l rachetòn nuant'ön
me so miss a sparaghe adoss... l'era la fen del mund!
Al distacament i ga sentit, 'n'eri slungat en qual v'ön
quand 'na patuglia la vegnia de luntan, en fund...

El capitani, el ga cumpilat el verbal de la me asiòn.
Ma ...fürbu! Mia tropp cunvint... el ga tucat el tast.
El m'ha dat la medaia, i galòn cu la mutiasiòn...
Ma 'l sa mia che a Suresina i ga fat bef l'oca 'ndel fiasc.