A 'N PUETA

'N pòo de verd...

-Cara, lassete vardàa, se l'è cume go sentìt...
che schèrs che j t'ha fatt, brütt e antipatic.
'na roba cuŝè , j l'ha mai fatt 'n de nissön sit
eppur, el mund l'è grand e pièn de lünàtic.

Saressi vegnida 'n sö'l meŝ-dé, 'l frédd 'l me fa mal
ma ŝe gòo patit e cridat, 'n del lec-c 'l giurnal.

La ŝént la città, l'è tüta stüpìda e 'ndignada
ognön 'l diŝ la so, te sentisset...e senŝa cumpassiòn
j völ mett a la früsta “'l pitur de la bravada”
e j faréss bén, t'l giüri, per chel pòo de edücasiòn.

Se diŝèt Pepòn... parla te che te set 'n General,
ghe n'era amò de faà, che ghè veŝèn 'l Nadal ?

'L dighi semp me che a ste mund ghè pö de religiòn...-
--Me te ringraŝi “Picciotta” per “chll'amur cuŝì grand”...
perchè ghe l' hai mia fatt al Teseo, o a Genala alla staŝiòn ?
Süga li to lagrimi e vardeme, e ragiuna chell tant.

L'è stata “la Santa Luŝìa” per 'n popul de pütèj
'na penelada de speranŝa, per vedie veŝèn cume fradej

L'è mej cuŝè: che 'l “Zoddo” 'l ga straacàt la tuletta
sü nò 'l me 'mpütüràa el Poncho e anca 'l capèll
'l gà rinverdit sultant chella meŝa Italiètta
che de tütta la pianta, la fiurìss 'l bruchèll...

'N pittur o 'n folle, l'è semper 'n pueta genial
che gà dat 'l verd alla fàma de 'n “vec-c General”--

-Ma perchè, te che 'ndelli tò batàgli te ghèt vit reŝòn
te set stat cun la spada 'n man a sübii l'ümiliaŝiòn?

--Oh quanti 'n ha fatt de pess alla Patria! J ga dat el blö
e po' el negher, 'l russ e anca 'l bianc
e i sügütarà fin quand de culur gh 'n sarà pö
o fin che,, j'omm de bòn sèns... i truarà 'n sembiant.

Me resti chì a spetàa, e i paserèn de la strada
i vee a fa 'l gnàl 'n de l'elsa de la me spada.--