A 'N PUETA

El gall de Marièta

La Marièta l'era en granelén de péèr, a dill fra numm
ma, en de la sücca, la ghera gna en briŝinén de sal.
Me so mia cume la fàa a scampàa, cu' na méŝa pensiòn
del so Bigin e 'i öf de quater galini... chest el summ!
La ghìa anca en gall fiurat, maestus cume en cardinal.
Alla mattina el fàa de chèi acüt d'en tenur de vucasiòn.

Perfètt cume n'ureloc-c el ciamàa la ŝent a messa.
Campani e campanèr i ghèra pö e, Don Giuànn el cürat
de San Rocc, el durmìa amò. Intraprendent, fén parladur
el fàa 'i uri piculi a lec-c e a stüdia 'na rèssa
de pratichi de sbrigà. Chèl pacchèt de laurà 'retrat...
Dunasiòn e altri ufferti fatti da ŝent al Signur.

E, alla matina el se fàa desideràa. Li duni en söl sagrat
magari enfilsi del fredd, li cuminciàa a mugugnàa.
Mariètta che de paŝiensa la ghe n'era propria mia
la brengugnàa en di dent... Entant la s'era segnat
en sö la frunt per vighe n'idea, buna de sfurnàa...
Se, el me gall, el ghe farà finìi de runfegà...Ave Maria.

Fo vèdui li me galini! - Cuŝè, cu'l gall sutta el brass
la va en canonica, propria en de l'ura del meŝdè.
- Don Giuànn el me scüŝi , me... vöri faghe en regall.
Go agnuma tre galini... e li me fà danà. L'è en gradass
cume certi... Bè lassum endàa, l'è mèi taŝ de lè!
e, pò el la ciamarà per mèssa prima! Ghe lassi el me gall.-

Don Giuànn en tütta unestà el pensàa: Perchè goi de léà sö
a cinq'uri per dì la messa... per i solìt quater gatt!
La ŝent adess la sta bèe jè dientat comud... come i pret:
I'è finit i temp de la fam. La ciamada del gall la serf pö!
Li tradisiòn li mör v'öna a v'öna e me, so mia matt
de endàa cuntra li santi cumudità... el diŝia en segrèt.

Mariètta la và cu 'na lagrima che la se süga cu 'scussal.
E, don Giuànn el se tröa chèl bel gall en de li man.
- Mettumese d'accordi giuinott, per el bel vif e 'l bel andàa.
Patti ciàr e amicisia lunga... cu 'na suculada en del nas
se te ma rumpét...aànti  l'Ai-Maria... pröa duman.
Chì ghè buna taula, n'arem de femeni cume en sültan...-

Cuŝè che l'ha mola en del serài, li galini e i pulaster
curius i ghe curr enturnu. "Anca cheschì se 'l canta
el düra mia! "Pensa la Cina, la galina veccia", A menu chè
prima d'en dà a lett el ghe 'ntorci sö el becc cu'l naster,
cume 'l ga semp fatt cu'i alter gài...Oh Madona Santa!
Amò vergini e védui...védi en bel rost per el so meŝ-dè!!!