A 'N PUETA

'L paltò de lègn

'N sö 'l curs, de frunt a San Rocc
ghé 'n negoŝi, n'espusiŝion permanent.
Manca mia i còfen de lüssu e cümünn
e Cezèr, titular, tütt 'n de 'n tocc
'n sö l'üss de butega, 'l dàa de l'intent
che per chell, 'l ga paroli e berlömm.

La ŝent la vegnia föra da messa
'ntant, meter 'n sacocia, 'l d'ucciàa
'n qual vön, de fase ütàa a descargàa
dei còfen. L'era festa e 'l ghera fressa.
Eccu 'l Brütsc e s-ciatron, du de cuppia
al Griŝ e al lütstron che i stàa a 'spettàa.

Finit: 'l Brütsc 'l ga n'idea. Se pudaress mia,
pruan v'ön, saress n'esperienza de fàa!
Chestu chì, laurat d'intaj e de scarpell...
'N paltò de legn per l'ültim viac-c. Alegrìa!
Cu' 'lvelüt, 'l piŝ san-gall, 'l passa-maa
me, chi dént, starèss ben cume 'n pütell!

'L se bütta ŝu dent e 'l sara j öc-c.
Ceŝèr 'I ciapa la bala al salt
'l ghe mett 'l querc e quater vidi d'utton.
Tütti i ghigna cu' la panŝa 'n so i ŝenöc-c
po' se möf, che ŝa 'l sul 'l se fa cald
chell picul curteo, pien de cumuzion.

'L cimiteri l'é la vecia lucanda del Capéll
'n del ven bianc, che se nega ogni penŝer...
'N de la strada, la ŝent diertida e surpresa
la ridd,dei quater bechèn a pàss da camell.
Manca a mo' 'n mocul piŝ 'l ruŝari dei mister
a chell funeral del Brüsc, fat cun poca spesa.

Al Capèll ghé aria de festa: po' tütti i taŝ,quand
se vedd 'na cassa de mort 'n sö 'l taul de mess,
e, föra li vidi, via 'l querc... bianc cume 'na peŝa
se 'n driŝa 'n péé 'l Brüsc... se spetta chell tant,
...senza respir, i laber blö... Ghe s'é vurit 'n pess
a fai rinvegnii a sberli e, cu' ven bon de 'na meŝa.