A 'N PUETA

El fiur per la mama

Cuŝa pröi, quand vegni a truate “al paes dei mort”
mama! Cume l'è crüt 1'invernu, en silensi desèrt
en ciel sensa sul, gnàa el verd el ga el so culur!
La parola “Risorgerete” sura 1'ingrèss, la suna stort...
El so che de eternu ghé agnuma el ripos!
El cuncert che te fà i passérén, i par lament pien d'amur.

I te fà visita e i ghe lassa el sègn.
I ciprèss i gàa amò li talamori dei ragnìn de 1'estat;
...li pàni dei martinèi en del porta-ciarén.
Li lümaghi e li lüserti li par scapadi adès-adèss.
I fiur fint i te pias mia, e mé me ne so'ardat...
Go en fiur d'afètt: 1'è 'na rima d'en pueta picenén.

Te cüntarò de quand go truat en gnal de russ-gos
e, dopu tant temp so amò pièn de penser.
L'estat apena passat, en de la sés de l'ort,
s'eri adrèe a sfurbèŝàa en d'en dé de ripos
Quand go sentit en ciciaràa che fàa piaŝer
...so restat en sö i du pèe, en po'assort.

E cuŝa édi? Se, el so che l'è 'n gnal de rus-gos
ma da chèl dé, so semp endat a daghe 'n'uciada.
In mès ai fiurelèn, 'na föia che fàa de tendina
e, en “del gnal dei du spus ghera quater bambos”.
I spassàa, i cumedàa i cussén, e chèlla ciciarada...
Ma semper suspetus, i lèàa e i giràa la crapelina.

I me penser i'ndàa endré a quand sii putéll
e, te vedii mama a fà i mester e a preparà 'l disnàa.
Te cantàèt semper sutta vus, li cansunetti d'amur.
Po' te se métìèt en so la scregnina en del tinell
cu'li gucci lunghi de la lana per scalfaruttàa
'na maia. Oh! Ch'lla maia a righi de tanti culur!

En del tò càagnulén ghera tanti gambiséi
e de tütti i culur, v'ön ligat a 1'alter e via
...li to man li ghera semp chèlla cadènsa
legera, se vedìa mia en punt che fàa i grinséi.
I öc-c attent, semper piena de premura, ghera mia
en mument, 'n'atìm che té te füdèsset assenta.

l gambiséi i te giràa en scoos fina a sparìi.
Ma, me parìa che, cu'1 fil li to man li laurèss
el “fil d'en gambiséll gross del to amur”.
Che guarnat en del to cör... el sügütàa a rivegnìi.
El se esaurìa mai. Oh! Se amò se pudèss
truàa chèlli robi pieni del to calur!

Me so imaginat en del gnal dei russ-gos
en cumpagnia de chèi “quater ŝümelén”
Entant che la so mama tütta endaffarada
l'era en turnu a ciapà d'empienighe el gos
me so sentit amò 'n pütéll, en piccul angelén
beat,per 'na leŝion bèlla, che la và 'mparada!