A 'N PUETA

Dàanti a 'n munumént

-Pepén so chì, te dighi che 'n ho fatt 'na péll
so stata al cimiteri, che nuitàa, ghè 'n munumént nöf !
Dedicat aj'avisén, pian bèll bèll cu'l me bacaréll...
S'eri  curiusa, te dighi che l'è na roba che cumöf !

Eh! l'umanitàa 'n pò per dé la tröa 'l sò destén.
I temp i cambia, cambia la ŝènt... me scultèt Pepén?

Te dighi che la ŝent de bon sèns la fa distinsòn
fra 'l ben e ' mal: I catif i farà 'l cincéll...
ma i bòn i dà 'l sang cun amur e decisiòn.
Se, a li guerri i ghe sararà 'n faccia 'l cancéll!

'N dé sarum tütti fradéi de sang, ma prima de la fén
sarum fradéi 'n de l'anima... me capiset Pepén?-

-Picciotta, el sul 'l t'ha dat i baligurdott...-
-Set gelus perchè ciapada de 'n pò de sentiment...-
-Sò stüff de scultate e'n qual de fò fagott!-
-...Perché me sò fermada dàanti a'n munument?-

-'L sang che go perdit, ferit 'n sö l'Asprumunt
se pudess catal sö cu li man 'l darèss al mund...

Sò 'ndat sudàa 'n sö la terra magra de Caprera
per culpa de certi filibüstier e testi caldi...
cul féel 'n del stomèc, go vist e spetat la sera
..e amò, me senti dìi, “mannaggia a Garibaldi”.

L'era mej... -Oddio Pepén va mia föra dei paj!
Te set sempèr 'n del nost cör... cu i noster maj.

Pensum ai malat, ai ferit del lauràa e de la strada.
'nsegnumeghe ai giuèn cume se fa a jss generus.
Metum de part li glori del passat e de la spada,
'n po' de pietàa, sultant per i pussè bisugnus.

Basta fa fiurìi 'n del cör 'n bucciulèn d'amur
che la nostra esistensa  grama la cambia culur!

Adèss anca mè so veccia ma, ai me temp
'n giüinott cu i barbisén risulat 'l saòn
na olta el m'ha dat 'n baŝèn pièn de sentimènt
che a pensaghe e ricurdal...senti amò i sgrisulòn.

A da 'l sang a'n malat l'è cume dàa 'n ba baŝèn.
Te cun tütti chelli duni che te g'het vit, è Pepén?

'L malat el pröa 'n föc curr ŝu per li vèni
… cume me bruŝai d'amur e, smurtina cume seri
go pruat a ghignàa 'n faccia a li me peni,
salute e speransi j'è mai atati cusì veri.-

-Sò n'òm de marmu... ma te me cumöet pian pian
che so chi, a salüdàa “j'aviséen” cu 'l capèll 'n man!